top of page
_edited.png)
Prosjekt
Utval
Foto: Knut Markhus
Kraftturisme
Prosjektet «Kraftturisme. Opplevelser i det vestnorske kraftlandskapet» har som overordna mål å samordna og legga til rette for at det kan utviklast brei verdiskaping basert på ei kopling mellom eldre kraftinstallasjonar som i dag er opne for besøk, og reiselivsbedrifter i regionen som saman kan skapa eit attraktivt reiselivsprodukt.
Mitt konsulentoppdrag går ut på å auka kunnskapen om dei prosessane som foregår i hovudprosjektet, og med det bidra til kunnskapsoverføring til andre verdiskapingsprosjekt basert på aktiv bruk av kulturarven.
Oppdragsgjevar er Vestland fylkeskommune som gjennomfører prosjektet saman med Rogaland fylkeskommune.
Forprosjekt Frolands Verk
Forprosjektet 2024-27 skal leggja til rette for å oppretta fullskala museumsdrift på Frolands Verk i Agder. Verket er eit flott kulturmiljø som innheld spennande historier. Lokalt og regionalt har det dels freda anlegget nok å koma med som historieforteljar om det sosiale livet ved eit jernverk, i autentiske omgjevnader. Men nasjonalt interessant blir det først når me legg til nokre andre høgst spesielle element Frolands Verk kan by på. Ja, då kan anlegget faktisk ha internasjonal interesse.
Prosjektet følgjer opp moglegheitsstudie "Fullskala museumsdrift på Frolands Verk" som eg utabeidde 2023-24. Denne kan lesast her.
Årboka Hardanger
Arbeidet med årboka Hardanger rullar gjennom heile året, slik det har gjort gjennom generasjonar. Den 116. utgåva kom ut i november 2024, og har innhald om alt frå spretne folkedansarar til kjenslevare rosemålarar og håpefulle utvandrarar. I sin artikkel om kyrkja på Lofthus spør Guttorm A. Rogdaberg: Kvifor var Ullensvang så viktig at det måtte setjast opp ei stor steinkyrkje her når ein kunne klart seg med ei stavkyrkje? Var det stormannsgalskap og god tilgang til midlar, eller var det grunnar me ikkje kjenner til?
Årboka stiller mange spørsmål og gjev nokre svar, og pirrar forhåpentleg historieinteressa hjå lesarane.
Eg er redaktør, og kan i denne samanhengen kontaktast på redaksjon@hardanger-historielag.no
Galgenhumor, bokprosjekt
Gjennom mennesket si historie har galgenhumoren vore god å gripa til, som ein sterk alliert i krisetider. Galgenhumoren er eit kulturelt og psykologisk fenomen som blir omtala som svart, men som står i lyset si teneste.
Eg finn ikkje norske sakprosabøker som konsentrert ser på galgenhumor som kulturelt fenomen, eller på dei psykologiske mekanismane som er i sving. Heller ikkje bøker som noko grundig dreg oss gjennom galgenhumorens historie. Difor har eg gått i gang med å laga ei bok om dette, og fått støtte frå NFFO og Fritt Ord. Boka skal ut på Skald forlag hausten 2025.
Jon Fosse sin barndomsheim i Strandebarm. Foto: Knut Markhus
Forprosjekt: Jon Fosse-senter
Tildelinga av Nobelprisen i litteratur har sett fart i Fosse-stiftinga sitt arbeid for å etablera eit Jon Fosse-senter i Strandebarm, der forfattaren kjem frå. På initiativ frå Vestland fylkeskommune er det etablert eit forprosjekt, som eg har fått i oppgåve å gjennomføra.
Forprosjektet skal avklara korleis ein kan sikra gode og realistiske planar for utvikling og drift av eit senter, greia ut kva som er eit realistisk omfang av evt. investeringar, og skissera korleis dette kan løysast.
Prosjekteigarar er Fosse-stiftinga, Kvam herad og Vestland fylkeskommune. Rapport levert 3. oktober 2024, og kan lesast her.
Foto: Anders Beer Wilse, Nasjonalmuseet
Gaffelriggen - fagbok
Boka "Gaffelriggen - seiling og håndtering" blei utgitt av Hardanger og Voss museum i 2023, og gjev detaljerte råd og tips om korleis ein kan utvida komfortsona ved å bruka segl på sjøen. Forfattarane er tre seglarar frå Hardanger fartøyvernsenter, og boka er den første i ein serie av publikasjonar om gaffelriggen dette fagmiljøet vil gje ut.
Mi rolle i prosjektet har denne omtalen i boka: "Forfatter og historiker Knut Markhus har tålmodig gjort sitt beste for å rydde opp i manuset, se til at vi forhåpentlig har skrevet forståelig. plassert kommaene på riktig plass og kommet med gode innspill. Han har vært viktig for å dra dette sammen til slutt."
Frå vlfk.no
Regional kulturplan Vestland
Den første regionale kulturplanen for Vestland fylke vart vedteken med applaus i mars 2023, og det oppfølgande handlingsprogrammet fekk si godkjenning på hausten. Dette skal vera langsiktige planen for utviklinga av kulturfeltet i Vestland, og skal gjelda til 2035.
Eg var sentralt med heile vegen i dette storprosjektet. I ein tidleg fase av planarbeidet leia eg arbeidsgruppa for verdiskaping, og gjekk inn som ekstern fagredaktør for heile planen då denne skulle skrivast, og også for handlingsprogrammet.
Sjå planen her
bottom of page